पहिरोमा परि १ जनाको मृत्यु, २ जना गम्भीर  घाइते

काठमाडौं– दोलखाको विगु गाउँपालिका-१ हुरहुरेमा पहिरोमा परी १ जनाको ज्यान गएको छ भने दुई जना गम्भीर घाइते भएका छन् ।

सानिमा हाईड्रो जाने सडक सर्भे गर्ने क्रममा माथिबाट झरेको पहिरोमा परेर नुवाकोट विदुर नगरपालिका-४ का २९ वर्षीय सुनिल न्यौपानेको मृत्यु भएको जिल्ला प्रहरी कार्यालय दोलखाले जानकारी दिएको छ । पहिरोमा परी गम्भीर घाइते भएका न्यौपानेको उपचारका क्रममा मृत्यु भएको हो ।

पहिरोमा परि घाइते भएका रामेछाप लिखु तामाकोसी गाउँपालिका-४ का विशाल बुढाथोकी र सिन्धुपाल्चोक मेलम्ची नगरपालिका-१ का सन्दिप चौलागाईं गम्भीर घाइते भएको प्रहरीले जनाएको छ । दुई जनाको अवस्था गम्भीर रहेको छ । उनीहरू तीनै जना सानिमा हाईड्रोको कर्मचारी रहेको प्रहरीले जनाएको छ ।

पहिरोबाट उद्धार गरिएका उनीहरूलाई हेलिकप्टरमार्फत थप उपचारका लागि काठमाडौं लगिएको हो । चीनसँग सिमा जोडिएको लप्ची नजिकै सानिमाले जलविद्युत् निर्माण गरिरहेको छ ।