धादिङको रामकोटमा आजबाट पञ्चमी मेला लाग्दै

धादिङ– धादिङको नीलकण्ठ नगरपालिका–८ रामकोटमा पञ्चमी मेला आज कात्तिक २३ गतेबाट सुरु हुदै छ । पुजा आजा गरि मागेको आशिवार्द तथा मनले चिताएको पुरा हुने विश्वासका साथ भक्तजनहरु हरेक वर्ष रामकोटमा लाग्ने पञ्चमी मेलामा पुग्ने गर्दछन् ।

Advertisement

कात्तिक २३ गते अर्थात् आइतबार चौथीका दिन ठूलो जात्रा लाग्ने गर्दछ । फुलको डोली लाने रातभरि जाग्राम बस्ने, रमाइलो गर्ने गरिन्छ । मण्डलीदेवी र मण्डलेश्वर महादेवको पुजा गरि आशिष माग्ने चलन रहि आएको मन्दिर व्यवस्थापन समितिका अध्यक्ष सुर्यबहादुर मगरले बताए । ‘मण्डलीदेवी जेठी र माइली रामकोटमा रहेको छ । कान्छि बहिनी भने यहाँ बस्दिन भनेर खोला तरेर टाढा जाने क्रममा ढोला मण्डलीमा गएको भन्ने किम्बदन्ती रहेको छ’ उनले भने ।

रामकोट दरबारले पनि प्रख्यात रहेको छ । भग्नावशेषहरु अझै पनि भेटिने उनले बताए । चौथीमा पुजा गर्र्ने र पञ्चमीमा बली चढाएर पुजाआजा गर्दा मनले चिताएको कुरा पुरा हुने विश्वास चलि आएको उनको भनाई छ । देवीको पुजा मगर जातिले गर्ने र मण्डलेश्वर महादेवको पुजा चाँहि बाहुन जातिले गर्नु पर्ने चलन रहि आएको छ । देवीको पुजा विवाह नभएको मगर जातिका १२ वर्ष भन्दा कम उमेरका बालकले गर्दै आएको उनले बताए ।

मेलालाई आकर्षक बनाउन लोप हुदै गएको रोटे पिङ हालिएको स्थानीय आकाश मगरले बताए । डाँडामा रहेको मन्दिरबाट सुन्दर दृश्यावलोकन गर्न सकिने र मन्दिरमा पुजाआजा गरि मागेको आशिर्वाद पुरा हुने विश्वासले हरेक वर्ष भक्तजनहरुको भिड लाग्ने गरेको उनको भनाई छ ।
मन्दिरसहित आसपास सजाएर बत्ती बाल्ने पालाहरु राखिएको उनले बताए । गत वर्षहरुमा भन्दा मेलालाई थप भव्य बनाउन व्यवस्थित गरिएको उनको भनाई छ ।
वडामा रहेको ऐतिहासिक तथा पर्यटकिय क्षेत्रलाई संरक्षण र व्यवस्थित गर्न वडाले पनि पहल गर्दै आएको नीलकण्ठ नगरपालिका वडा नम्बर ८ का वडा अध्यक्ष प्रकाश कुमार श्रेष्ठले बताए । उनले भने– ‘हाम्रो वडा भित्र रहेका धार्मिक तथा सांस्कृतिक सम्पदाको संरक्षण तथा पर्यटन प्रर्वद्धनमा विशेष योजना बनाएर काम गरिरहेका छौैं ।’