स्व. मनोज श्रेष्ठ स्मृति कपको उपाधी धादिङले जित्यो 

धादिङ– स्व. मनोज श्रेष्ठ स्मृति कप बागमती प्रदेश स्तरीय अन्तर जिल्ला महिला भलिबल प्रतियोगिता २०८२ को उपाधी धादिङले जितेको छ । धादिङबेसीमा शनिबार भएको फाइनल खेलमा सिन्धुपाल्चोकलाई ३-० को सोझो सेटमा पराजित गर्दै धादिङले उपाधि हात पारेको हो ।

धादिङले सिन्धुपाल्चोकलाई २५-१०, २५-६ र २५-७ ले पराजित गरेको हो । उपाधिसँगै धादिङले नगद २ लाखसहित ट्रफी, मेडल र प्रमाण–पत्र प्राप्त गरेको छ । त्यस्तै, प्रतियोगितामा सिन्धुपाल्चोक द्धितिय, रामेछाप तृतिय र नुवाकोट सान्त्वना भएका छ्न् । द्धितिय, तृतिय  हुनेले क्रमशः  एक लाख, ५० हजार नगदसहित ट्रफी, मेडल र प्रमाण-पत्र प्राप्त गरेका छ्न् ।

शनिबारनै तेस्रो स्थानका लागि भएको खेलमा रामेछापले नुवाकोटलाई ३-२ को सेटमा पराजित गरेको हो । रामेछापले नुवाकोटलाई २३-२५, २५-१० र २३-२५,२५-८ र १९-१७ ले ३-२ को सेटमा पराजित गरेको हो ।

प्रतियोगितामा उत्कृष्ट खेलाडी धादिङकी रेविका लामा तामाङ, उत्कृष्ट स्पाइकर धादिङकी सलिना गुरुङ, उत्कृष्ट सटर धादिङकै भावना तामाङ, उत्कृष्ट डिफेन्डर धादिङकी जमुना गुरुङ, उत्कृष्ट सर्भर रामेछापकी एलिसा श्रेष्ठ र उत्कृष्ट कोच धादिङका बिरु लामा घोषित भए । उत्कृष्ट खेलाडी रेविकाले नगद ५ हजार र ट्रफी पाए भने उत्कृष्ट स्पाइकर, सेटर, डिफेन्डर, सर्भर र कोचले समान नगद २/२ हजार सहित ट्रफी प्राप्त गरेका छन् ।

धादिङ जिल्ला भलिबल संघको आयोजनामा पुस ९ गतेदेखि शुरु भएको प्रतियोगितामा बागमती प्रदेश भित्रका ८ जिल्लाबाट ९ टिम सहभागी रहेका थिए । जसमा धादिङका दुई टिम, नुवाकोट, रसुवा, चितवन, मकवानपुर, सिन्धुली, रामेछाप र सिन्धुपाल्चोक रहेका थिए । प्रतियोगिताको अवसरमा धादिङ जिल्ला भलिबल संघले न्यु डायमन्ड क्लबका प्रशिक्षक तथा प्रिन्सिपल कुमार राई, काभा यु–१९ च्याम्पियनसिप खेलेका भावना तामाङ, रेविका लामा तामाङलाई नगद र प्रशंसा पत्रसहित सम्मान गरेको छ ।

कार्यक्रमकाको समापन समारोहको सम्बोधन गर्दै नीलकण्ठ नगरपालिकाका नगर प्रमुख एवम् नेपाल नगरपालिका संघका अध्यक्ष भीमप्रसाद ढुंगानाले धादिङ महिला भलिबलको ऐतिहासिक उपलब्धिले जिल्लाको खेलकुद पहिचानलाई अझ मजबुत बनाएको बताए । आगामी दिनमा राष्ट्रिय स्तरका भलिबल प्रतियोगिता धादिङमा आयोजना गर्न नगरपालिकाले आवश्यक सहयोग गर्ने प्रतिवद्धता व्यक्त गरेका छन् । खेलकुदले युवालाई अनुशासित, सक्षम र राष्ट्रप्रेमी बनाउने भएकाले स्थानीय तहले खेलकुद पूर्वाधार विकासलाई प्राथमिकतामा राखेर काम गरिरहेको उनले बताए ।

धादिङ जिल्ला भलिबल संघका अध्यक्ष अमृत गुरुङ (तिलक) ले धादिङले राष्ट्रिय तथा अन्तर्राष्ट्रिय स्तरमा धादिङले थुप्रै महिला भलिबल खेलाडी उत्पादन गर्न ठूलो भूमिका खेलेको बताए ।  खेलाडीको निरन्तर अभ्यास, प्रशिक्षकको मेहनत र स्थानीय तहको सहयोगले मात्रै यस्तो सफलता सम्भव भएको भन्दै आगामी दिनमा भलिबल खेललाई अझ व्यवस्थित र व्यवसायिक बनाइने उनले बताए ।

Advertisement