किन्डर वर्ल्डका विद्यार्थीद्वारा परेड, सलामी र खुकुरी नृत्य प्रदर्शन

धादिङ– नीलकण्ठ नगरपालिका–३ त्रिवेणीनगरमा अवस्थित किन्डर वर्ल्ड बोर्डिङ स्कुलका विद्यार्थीहरूले देशका सुरक्षानिकाय (नेपाल प्रहरी, नेपाल सेना तथा सशस्त्र प्रहरी बल) लक्षित परेड प्रदर्शन, सलामी अर्पण तथा खुकुरी नृत्य प्रस्तुत गरेका छन् ।

खेलकुद महोत्सवको पूर्वसन्ध्यामा आयोजित कार्यक्रममा विद्यालयका विद्यार्थीहरूले धादिङ जिल्लाको सदरमुकाम धादिङबेसीस्थित बीच बजार चोकमा परेड प्रदर्शन, सलामी अर्पण तथा खुकुरी नृत्य प्रस्तुत गरेका हुन् ।

विद्यार्थीहरूको कला, अनुशासन र देशप्रेम झल्किने प्रस्तुतिले राष्ट्रप्रतिको माया र अनुशासन विकासमा सहयोग पुग्ने किन्डर वर्ल्ड बोर्डिङ स्कुलका प्रधानाध्यापक सूर्य श्रेष्ठले बताए । ‘यस्ता कार्यक्रम तथा गतिविधिले विद्यार्थीहरूको सर्वाङ्गीण विकासमा ठूलो टेवा पुग्दछ । किताबी ज्ञानसँगै व्यवहारिक ज्ञान र अतिरिक्त क्रियाकलाप आजको शिक्षामा अपरिहार्य छन्,’ उनले भने ।

कार्यक्रममा विद्यार्थी, अभिभावक तथा सम्बन्धित सुरक्षानिकायका प्रतिनिधिहरूको उल्लेख्य सहभागिता रहेको थियो । विद्यार्थीहरूको प्रस्तुतिप्रति अभिभावकहरूले उत्साह व्यक्त गर्दै विद्यालयको शैक्षिक तथा अतिरिक्त क्रियाकलापको प्रशंसा गरेका थिए ।