बुढीगण्डकी जलविद्युत आयोजना निर्माण गर्न एमाले उम्मेदवार घलेद्धारा हस्ताक्षर

धादिङ– बुढीगण्डकी जलाशययुक्त जलविद्युत आयोजनाको निर्माण कार्य तत्काल सुरु गर्न दबाब दिने उद्देश्यले दशौं धादिङ महोत्सव स्थलमा हस्ताक्षर अभियान सञ्चालन भइरहेको छ । एमाले धादिङबाट निर्वाचन क्षेत्र नम्बर २ का आसन्न प्रतिनिधि सभा सदस्यका उम्मेदवार धनबहादुर घलेले समर्थन जनाउदै हस्ताक्षर गरेका छन् ।
उम्मेदवार घलेले निति निर्माण तथा जलविद्युत आयोजना निर्माणलाई आफ्नो एजेण्डाको मूख्य रुपमा लिदै आएका थिए । ‘धादिङ र गोर्खाको मात्र नभएर राष्ट्रकै गौरवको आयोजना हो । जसरी पनि आयोजना तत्काल सुरु गर्नु पर्छ । बुढीगण्डकी जलविद्युत आयोजनासँग सम्बन्धित सरोकारवाला निकाय तथा प्रभावित नागरिकहरुसँग छलफल गर्दै आएको छु । नागरिकका समस्या समाधान तथा छिटो भन्दा छिटो जलविद्युत आयोजना निर्माण सुरु हुन्छ’ उनले भने ।

Advertisement

घलेसँगै नेकपा एमाले धादिङका कार्यबाहक अध्यक्ष अर्जुन कुमार श्रेष्ठ (गोर्खाली), सचिव राधिका सापकोटा, उपसचिव भक्त बहादुर लामिछाने, डाक्टर रामकुमार अधिकारी लगायतका एमाले धादिङका नेताहरुले अभियानको समर्थन जनाउदै हस्ताक्षर गरेका छन् ।

सरकारलाई दबाब दिएर छिट्टै बुढीगण्डकी जलविद्युत आयोजना निर्माण कार्य सुरु गर्न धादिङ उद्योग वाणिज्य संघले आयोजना गरेको दशौं धादिङ महोत्सवमा हस्ताक्षर अभियान सुरु गरिएको हो ।