आसन्न निर्वाचन शान्तिपूर्ण र निष्पक्ष हुन्छ : गृहमन्त्री अर्याल

काठमाडौं– आसन्न फागुन २१ गते हुने प्रतिनिधिसभा सदस्य निर्वाचन शान्तिपूर्ण, निष्पक्ष र धाँधलीरहित हुने गृहमन्त्री ओमप्रकाश अर्यालले बताएका छन् । निर्वाचन सुरक्षा सम्बन्धि अनुगमनका क्रममा धादिङ आइपुगेका गृहमन्त्री अर्यालले जिल्लास्थित सुरक्षा निकायका प्रमुख, सरोकारवाला निकाय तथा पत्रकारहरुसँग कुराकानी गर्दै शान्ति सुरक्षाको दृष्टिकोणले आवश्यक सबै तयारी पूरा भइसकेको बताएका हुन् ।

उनले वर्तमान अन्तरिम सरकारले संविधान पुनर्बहालीका लागि निर्वाचन अनिवार्य भएकाले चुनावको मिति तय गरिएको स्पष्ट पार्दै भने,- ‘चुनावी सरकारबाटै सञ्चालन हुने यो निर्वाचनलाई पूर्ण रूपमा स्वतन्त्र, निष्पक्ष र धाँधलीरहित बनाइनेछ।’

गृहमन्त्री अर्यालले विगतमा दलीय सरकारले सञ्चालन गरेका निर्वाचनभन्दा यो निर्वाचन अझ सुदृढ र विश्वसनीय हुने दाबी गरे । ‘यदि कतै गडबडी भयो भने त्यस्तो निर्वाचनलाई मान्यता दिइने छैन । आवश्यक परेमा त्यही क्षेत्रमा निर्वाचन रद्द गरी पुनः निर्वाचन गराइनेछ,’ उनले भने।

मतदाताले आफूले चाहेको उम्मेदवारलाई कुनै दबाब र भयबिनै ढुक्कसँग मतदान गर्न सक्ने वातावरण तयार गरिएको बताए ।  उनले भने,- ‘मतदाताले पनि आफ्नो मनोबल उच्च राख्नु होला । निष्पक्ष, धाँधलीरहित र राजनीतिक सुशासन सुनिश्चित हुने गरी निर्वाचन सम्पन्न गराउने हाम्रो प्रतिबद्धता हो ।’

Advertisement