पत्रकारितामा एआईसम्बन्धी अभिमुखीकरण, रुवीभ्यालीका अध्यक्ष तामाङ भन्छन्– ‘पत्रकारिता परिवर्तनको संवाहक हो’

धादिङ– धादिङमा डिजिटल पत्रकारिता, कन्टेन्ट निर्माण तथा पत्रकारितामा कृत्रिम बुद्धिमत्ता (एआई) को प्रयोग विषयक एकदिने अभिमुखीकरण कार्यक्रम गरिएको छ । डिजिटल युगमा पत्रकारितालाई समयसापेक्ष, विश्वसनीय र प्रभावकारी बनाउने उद्देश्यले तालिमको आयोजना गरिएको हो ।

Advertisement

अनलाइन मिडिया सोसाइटी धादिङको आयोजना र रुवीभ्याली गाउँपालिकाको सहयोगमा आयोजित कार्यक्रममा डिजिटल पत्रकारिता, सामग्री वितरण, एआईको प्रयोग र तथ्य जाँच (फ्याक्ट–चेकिङ) का विषयमा प्रशिक्षण गरिएको हो । तालिमका क्रममा डिजिटल मिडियामा समाचार लेखन तथा प्रस्तुतिकरणका विधि, सामग्रीलाई प्रभावकारी बनाउने उपाय, सत्य र तथ्यपरक सूचना श्रोता–दर्शकसम्म विश्वसनीय रूपमा कसरी पु¥याउने भन्ने विषयमा गहन छलफल गरिएको थियो ।

कार्यक्रमको उद्घाटन समारोहको सम्बोधन गर्दै रुवीभ्याली गाउँपालिकाका अध्यक्ष रामसिंह तामाङले पत्रकारिता देश विकास, सुशासन र सामाजिक रूपान्तरणको महत्वपूर्ण आधार भएको बताएका छन् । ‘पत्रकारिताले राज्य सञ्चालनदेखि नागरिक चेतना अभिवृद्धिसम्म महत्वपूर्ण भूमिका निर्वाह गर्दै आएको छ । प्रविधिको विकाससँगै डिजिटल प्रणाली र एआईको जिम्मेवार तथा प्रभावकारी प्रयोग गरि पत्रकारिता क्षेत्रलाई फड्को मार्न सकिन्छ’ उनले भने ।

उत्तरी धादिङका बासिन्दाले भोग्दै आएका आधारभूत समस्या राष्ट्रिय बहसको विषय बनाउनु पर्नेमा उनले जोड दिए । ‘रुवीभ्यालीसहित उत्तरी धादिङका धेरै स्थानमा वर्षमा करिब चार महिना सवारी साधन सञ्चालन हुँदैन । जसका कारण नागरिकले सामान्य सेवा लिन समेत कठिनाइ भोग्नुपरेको छ’ उनले भने, ‘तर यस्ता गम्भीर विषयहरू जिल्ला र राष्ट्रियस्तरमा पर्याप्त बहसमा आउन सकेका छैनन् । पत्रकारिताको क्षेत्रबाट कलम चले विकासले फड्को मार्ने थियो ।’

उत्तरी क्षेत्रमा निर्माणाधीन हाइड्रोपावर आयोजना, प्राकृतिक स्रोतसाधन तथा दुर्लभ ढुंगाखानी (स्टोन) को सम्भावनाबारे समेत पर्याप्त चर्चा हुन नसकेको उनले बताए । कानुनी जटिलता र सम्बन्धित निकायसँग समन्वय गर्दा पनि समस्या समाधान हुन नसकेको बताउँदै यस्ता विषयलाई पत्रकारितामार्फत गम्भीर रूपमा उठाउनुपर्ने आवश्यकता औंल्याए । साथै, रुवीभ्याली गाउँपालिकाभित्र रहेका ऐतिहासिक तथा पर्यटकीय स्थलहरूको पहिचान, संरक्षण र प्रवद्र्धन गर्न सके स्थानीय आर्थिक विकासमा उल्लेखनीय टेवा पुग्ने उनले बताए ।

एकदिने अभिमुखीकरण कार्यक्रममा फोटो तथा भिडियोका लागि प्रयोग हुने डिजिटल उपकरण र तिनको उपयोग, सोसल मिडिया एल्गोरिदमअन्तर्गत प्रयोगकर्ताको रुचि, सामग्री छनोट र समय व्यवस्थापन, सामग्री निर्माणमा एआईको उपयोगिता र प्रयोग विधि, तथ्य जाँच तथा भ्रामक सूचनाको पहिचान र फलोअप गर्ने तरिका, डिजिटल सुरक्षा, गोपनीयता र मोनेटाइजेसनसम्बन्धी विषयमा डिजिटल मिडिया प्रशिक्षक अनिल अधिकारी र डिआर आचार्यले सहजीकरण गरेका थिए । सहभागीहरूले तालिमले डिजिटल मिडियामा काम गर्न थप आत्मविश्वास बढाउनुका साथै व्यावहारिक सीप विकासमा महत्वपूर्ण सहयोग पुगेको प्रतिक्रिया दिएका छन् ।