एमाले धादिङले प्रदर्शनसहित प्रमुख जिल्ला अधिकारीलाई बुझायो विरोध पत्र

काठमाडौं– नेकपा एमाले जिल्ला कमिटी धादिङले पूर्वप्रधानमन्त्री एवम् एमाले अध्यक्ष केपी शर्मा ओली र नेपाली कांग्रेसका नेता तथा पूर्वगृहमन्त्री रमेश लेखकको पक्राउ विरूद्ध आइतबार धादिङ बेसीमा प्रदर्शनसहित प्रमुख जिल्ला अधिकारी विजयराज सुवेदीमार्फत सरकारलाई विरोध पत्र बुझाएको छ ।

Advertisement

शनिबार बिहान गरिएको गिरफ्तारीलाई प्रतिशोधपूर्ण, पूर्वाग्राही र गैरकानुनी भन्दै एमाले धादिङले प्रदर्शन गरेको छ । जिल्लाको सदरमुकाम धादिङबेसी पुछारबजारदेखि ¥यालीसहित जिल्ला प्रशासन कार्यालय धादिङ पुगेर प्रमुख जिल्ला अधिकारीमार्फत सरकारलाई विरोध पत्र बुझाएको हो । प्रमुख जिल्ला अधिकारी विजयराज सुवेदीले गेट बाहिरै आएर विरोध पत्र बुझेका हुन् ।

प्रदर्शन र विरोधपत्र बुझाएपछि विरोध सभा गर्दै निशर्त नछाडीए चरणवद्ध रुपमा आन्दोलन अघि बढ्ने उनीहरुले बताएका छन् । विरोध सभालाई सम्बोधन गर्दै एमालेका केन्द्रीय सदस्य खेम प्रसाद लोहनीले अध्यक्षलाई रिहाई नगरे देशमा आगो बल्ने चेतावनी दिएका छन् । ‘हामी विधिको शासनमा छौं । आन्लोलन र आगजनीको जगमा टेकेर बनेको सरकारले गरेको यो काम लोकतान्त्रिक मूल्य र कानुनी शासनविपरीत छ’ उनले भने– ‘गैर संवैधानिक र गैर कानुनी कामको विरोध र प्रतिकारमा छौं प्रतिशोधका लागि पक्राउ गरिएको छ । विना सर्त रिहाई गरिनुपर्छ । यो सुरुवात हो रिहाई नगरिए देशभर आगो बल्छ ।’

त्यस्तै, एमालेका केन्द्रीय सदस्य भुमी त्रिपाठीले मुलुकलाई आगो लगाएर जग बनाएको सरकारले असंवैधानिक काम गरेको बताए । ‘नाटक मञ्चन गर्दै कानुनविपरित निर्णय गरेको छ । यो नेकपा एमाले, कांग्रेसलाई मात्र पक्रेको होइन । प्रतिशोध गर्दै लोकतान्त्रिक मूल्य र कानुनी शासनविपरीत पक्राउ हो ।

एमाले धादिङले प्रदर्शन तथा विरोध पत्र बुझाउदै कानुन र संविधानविपरीत रहेको ठहर गर्दै दुवै नेतालाई तत्काल रिहा गर्न माग गरेको हो । एमालले देश भर आन्दोलन गर्ने र त्यसको क्षति सरकारले व्यहोर्नुपर्ने एमाले धादिङकी सचिव राधिका सापकोटाले बताएकी छन् । छानविनका लागि तत्कालिन सरकारले गौरी बहादुर कार्कीको अध्यक्षतामा गठन गरेको आयोग मान्य नहुने भन्दै आयोगद्धारा प्रस्तुत प्रतिवेदन पूर्वाग्रह, प्रतिशोध, अनुसन्धानको न्यायिक सिद्धान्तविपरित रहेको उनले बताइन् ।

सिंहदरबार, सर्वाेच्च अदालत, सार्वजनिक तथा व्यक्तिगत सम्पत्ति जलाउनेहरु सरकारमा पुगेर संविधान विपरित अध्यक्ष ओलीलाई पक्राउ गरेको एमाले अध्यक्ष अर्जुन कुमार श्रेष्ठ(गोर्खाली) ले बताए । ‘लिपुलेक लिम्पियाधुरा जस्ता भुभाग नेपालको भनि विश्वमा नेपाल कोहीसँग झुग्दैन भनेर सार्वभौमसत्ता र राष्ट्रियतामा अडान लिने एमाले अध्यक्ष केपी शर्मा ओलीलाई गलत सावित गरेर सिंगो एमालेलाई धक्का पु¥याउन खोजिएको छ । तर एमाले नेपाली जनता र राष्ट्रियताका लागि सधैं अडिग छ’ उनले भने ।