धादिङको कृष्णभिरमा माइक्रोबस दुर्घटना हुँदा ५ जना घाइते

काठमाडौं– पृथ्वी राजमार्ग अन्तर्गत धादिङको बेनीघाट रोराङ गाउँपालिका–७ कृष्णभिरमा माइक्रोबस सडकमा पल्टिएको छ । काठमाडौंबाट पोखरातर्फ जाँदै गरेको ग १ ख २७९६ नम्बरको माइक्रो बस अनियन्त्रित भई सडकमा पल्टिएको हो ।

माइक्रोमा चालक र सहचालकसहित १३ जना सवार रहेको जिल्ला ट्राफिक प्रहरी कार्यालय धादिङले जनाएको छ। दुर्घटनामा ५ जना घाइते भएका छन् । घटनालगत्तै स्थानीयवासी, प्रहरी तथा उद्धार टोलीले घाइतेहरूको उद्धार गरी उपचारका लागि नजिकैको स्वास्थ्य संस्थामा पठाएका छन्। घाइते सबैको अवस्था सामान्य रहेको प्रहरीले जानकारी दिएको छ ।

दुर्घटनापछि केही समय सडक क्षेत्रमा सवारी आवागमन प्रभावित भए पनि अहिले अवस्था सामान्य बन्दै गएको छ। दुर्घटनाको कारणबारे थप अनुसन्धान भइरहेको प्रहरीले जनाएको छ।