रोयम नेपालद्वारा सहकारीकर्मीलाई व्यवस्थापनसम्बन्धी पुनर्ताजगी तालिम

धादिङ — रोयम नेपाल धादिङले जीविका परियोजनाअन्तर्गत सहकारीकर्मीका लागि सहकारी व्यवस्थापनसम्बन्धी पुनर्ताजगी तालिम सञ्चालन गरेको छ । धादिङको नीलकण्ठ नगरपालिका–५ र नेत्रावती डबजोङ गाउँपालिका–५ मा रहेका सातवटा सहकारीका २६ जना प्रतिनिधि सहभागी तालिम दुई दिनसम्म सञ्चालन गरिएको हो ।

Advertisement

तालिममा सहकारी व्यवस्थापन, सुशासन, नेतृत्व विकास, वित्तीय व्यवस्थापन, अभिलेख व्यवस्थापन, जवाफदेहिता, सदस्यको सहभागिता तथा संस्थाको दिगो विकासलगायत विषयमा प्रशिक्षण दिइएको रोयम नेपालका परियोजना संयोजक हरिशरण धितालले बताए ।

उनका अनुसार तालिमले सहकारीकर्मीले यसअघि हासिल गरेको ज्ञानलाई पुनर्ताजगी गराउनुका साथै कार्यसम्पादनका क्रममा देखिएका चुनौती, अनुभव र अभ्यास आदानप्रदान गर्ने अवसर प्रदान गरेको थियो। सहकारीको प्रभावकारिता र दिगोपना अभिवृद्धिका लागि अपनाउन सकिने व्यावहारिक उपायबारे समेत सहभागीबीच छलफल गरिएको थियो ।

तालिमका क्रममा सहभागीहरूले समूहगत छलफल, अनुभव आदानप्रदान र व्यावहारिक अभ्यासमा सक्रिय सहभागिता जनाएका थिए। तालिमबाट सहभागी सहकारीका पदाधिकारी तथा प्रतिनिधिको व्यवस्थापन क्षमता थप सुदृढ गर्न सहयोग पुगेको रोयम नेपालले जनाएको छ।