नीलकण्ठका उपमेयर विश्वकर्माद्वारा शिक्षामन्त्री पुनसँग सुझावसहित पाँचबुँदे माग

काठमाडौं– नीलकण्ठ नगरपालिकाका उपप्रमुख दीपक विश्वकर्माले शिक्षामन्त्री महावीर पुनलाई शिक्षाको क्षेत्रमा सुधार र सिपमूलक शिक्षाको विस्तारका लागि पाँच बुँदे माग तथा सुझाव पेश गरेका छन् ।

Advertisement

मंगलबार काठमाडौंस्थित केशरमहल पुगेर शिक्षामन्त्री पुनसँग भेट गरेका उपमेयर विश्वकर्माले नीलकण्ठ बहुप्राविधिक शिक्षालयमा स्वास्थ्य तर्फको फार्मेसी कार्यक्रम सञ्चालन रोकिएको विषयमा ध्यानाकर्षण गराएका छन् । उनले सिटिइभिटी (CTEVT) का सदस्यसचिवको पूर्वाग्रह तथा न्यायोचित गरिकाले सम्बन्धन प्रक्रिया पूरा भएर पनि कक्षा सञ्चालन रोकिएको भन्दै तत्काल कार्यान्वयनका लागि मन्त्री पुनसँग आग्रह गरेका हुन् ।

स्थानीय तहबाट बजेट सुनिश्चित भइसकेको र फार्मेसी कार्यक्रम दर्ता भइसकेको अवस्थामा पनि प्रस्ताव हराइराख्ने र रोक्ने कार्य अन्यायपूर्ण रहेको उपप्रमुख विश्वकर्माले बताए । साथै, उनले देशभरका आंगिक शिक्षालय, सामुदायिक सिकाइ केन्द्र र सिपमूलक तालीम कार्यक्रम प्रभावकारी बनाउन नीतिगत सुधार आवश्यक रहेको बताए ।
उपमेयर विश्वकर्मा विगतदेखि नै धादिङमा सिप तथा प्राविधिक शिक्षाको क्षेत्रमा सक्रिय छन् । उनले विद्यालय व्यवस्थापन समिति अध्यक्ष रहँदा नीलकण्ठ–७ स्थित कर्णेश्वर माध्यामिक विद्यालयमा पहिलो सामुदायिक सरकारी प्राविधिक शिक्षालय स्थापना गरी भेटनरी (JTA) कार्यक्रम सञ्चालन गरेका थिए । २०७९ मा उपमेयर निर्वाचित भएपछि उनले नीलकण्ठ बहुप्राविधिक शिक्षालय स्थापनामा नेतृत्वदायी भूमिका निर्वाह गरेका थिए । जसले सोही वर्ष सिटिइभिटीबाट आंगिक शिक्षालयको रूपमा सम्बन्धन प्राप्त गरेको थियो ।

उपमेयर विश्वकर्माले हाल सरकारमा महावीर पुनजस्ता सक्षम र नवप्रवर्तनशील व्यक्तित्वको आगमनले “नागरिकमा नयाँ उत्साह र विश्वास जगाएको” भन्दै धन्यवाद पनि दिएका छन् । पाँच वुदेँ माग पुरा हुने विश्वाससहित शिक्षामन्त्री पुनलाई माग पत्र पेश गरेको उनले बताए ।

उपमेयर विश्वकर्माले शिक्षामन्त्री पुनलाई दिएका पाँच सुझावसहित मागहरु

१) स्वास्थ्य कार्यक्रम सञ्चालनका लागि निर्देशन – सिटिइभिटी परिषद्का सदस्यसचिव उदासीन देखिएकोले, प्रक्रिया पुगेका सबै आंगिक शिक्षालयमा स्वास्थ्य कार्यक्रम सञ्चालनका लागि चिकित्सा शिक्षा आयोगमा पठाउनुपर्ने ।
२) स्थानीय सरकारसँग सहकार्य – आंगिक शिक्षालयहरूलाई स्थानीय तहसँग जोड्दै छोटो अवधिका तालीममार्फत skill worker उत्पादनमा जोड दिनुपर्ने, श्रम स्वरोजगार दक्ष जनशक्ति वृद्धि गर्नुपर्ने ।
३) डिप्लोमा कोर्स छोट्याउने प्रस्ताव – विद्यार्थीहरू छिटो रोजगारी र अध्ययनमा जोडिन सक्ने हुँदा हालको ३ वर्षे डिप्लोमा कोर्सलाई २ वर्षमै सकिने गरी पाठ्यक्रम परिमार्जन गरिनुपर्ने ।
४) एक पालिका–एक सिकाइ केन्द्र – देशभर रहेका २१५१ सामुदायिक सिकाइ केन्द्रलाई ७५३ मा झारेर प्रत्येक पालिकामा बहुउद्देश्यीय तालीम तथा पुस्तकालय स्थापनाको सुझाव।
५)तालीम प्रणालीमा सुधार – सिटिइभिटी, सिप विकास केन्द्र, वैदेशिक रोजगार बोर्ड, युवा परिषद् लगायतका संस्थाका तालीमहरू दोहोरोपन नहुने गरी एकीकृत प्रणालीमा ल्याई उत्पादन, बजार र स्वरोजगारसँग जोडिने नीतिगत सुधार गर्नुपर्ने ।