धादिङको ओडारेमा घर गोठमा आगलागी हुँदा ८० लाख बराबरको क्षति

काठमाडौं– धादिङको त्रिपुरासुन्दरी गाउँपालिका–३ ओडारेमा भीषण आगलागी हुँदा ८० लाख बराबरको क्षति पुगेको छ । ओडारेका जीवन थापा मगरको घर र बाख्रा फार्ममा लागेको आगोले ७९ वटा बाख्रासहित कुखुरा लगायत धनमाल जलेर नष्ट भएको जिल्ला प्रहरी कार्यालय धादिङका प्रहरी नायब उपरीक्षक प्रकाश दाहालले जानकारी दिए ।

प्रहरी नायव उपरिक्षक दाहालका अनुसार आगलागीबाट मगरको ३ तलाको घर, गोठसहित ७९ वटा बाख्रा, गाईको बाच्छी १ वटा, २५ वटा कुखुरा, २ तोला सुन, २ लाख नगद, दुई वटा फ्रिज, काठ काट्ने मेसिन, खाद्यान्न लगायतका सामाग्रीहरु जलेर नष्ट भएका छन् ।

विद्युत सट भई आगलागी भएको प्रारम्भिक अनुसन्धानले देखाएको छ । करिब ८० लाख बराबरको क्षति पुगेको प्रहरी नायब उपरीक्षक दाहालले बताए ।

थापा परिवारलाई गाउँपालिकाले तत्कालका लागि आवश्यक राहत सामग्री उपलब्ध गराएको छ । गाउँपालिकाको तर्फबाट खाद्यान्न, लत्ताकपडा, बासका लागि टेन्ट (पाल), ग्यास चुलो, सिलिन्डर र भान्छाका लागि आवश्यक भाँडाकुँडा हस्तान्तरण गरेको छ ।