धादिङमा हात्ती गाडीको ठक्करबाट पैदल यात्री गम्भीर घाइते

काठमाडौं– धादिङको धुनिवेशी नगरपालिका–५ फुलौरेस्थित धार्के–सितापाईला सडकखण्डमा हात्ती गाडीको ठक्करबाट एक जना पैदल यात्री गम्भीर घाइते भएका छन् ।

काठमाडौंबाट धार्केतर्फ जाँदै गरेको बागमती प्रदेश ०१–०२५ च ९४८९ नम्बरको हात्ती गाडीले स्थानीय करिव ३२ वर्षीय विक्कि तामाङलाई ठक्कर दिँदा गम्भीर घाइते भएको जिल्ला प्रहरी कार्यालय धादिङका प्रहरी नायव उपरीक्षक सुवास हमालले जानकारी दिए । हमालका अनुसार  तामाङको टाउको र दाहिने कोखामा चोट लागेको र अवस्था गम्भीर रहेको छ।

घाइतेलाई तत्काल उद्धार गरी थप उपचारका लागि काठमाडौं पठाइएको छ । दुर्घटनामा संलग्न हात्ती गाडी र चालकलाई प्रहरीले नियन्त्रणमा लिएको छ ।  दुर्घटनाबारे थप अनुसन्धान भइरहेको प्रहरीले जनाएको छ।