रसुवा बाढीः धादिङका तीन जना सम्पर्कमा आए

काठमाडौं– चीनको तिब्बततर्फबाट भोटेकोशी नदीमा आएको आकस्मिक बाढीपछि सम्पर्कविहीन रहेका धादिङको खनियाबास गाउँपालिका–४ का तीन जना सम्पर्कमा आएका छन् । सम्पर्कविहीन भएका उनीहरु विहीबार परिवारको सम्पर्कमा आएको खनियाबास गाउँपालिकाका अध्यक्ष रणबहादुर तामाङले बताए ।

Advertisement

जलविद्युत आयोजनाको सुरुङमा काम गर्दै आएका ल्हसङ तामाङ, राज थोकर र कैलाश थोकर सम्पर्कमा आएका हुन् । ल्हसङका भाइ गोरखबहादुर तामाङका अनुसार बाढीपछि दाजुसँग सम्पर्क हुन नसक्दा परिवार निकै आत्तिएको थियो । दाजुको मोबाइल स्वीच अफ भएकाले थप चिन्ता बढेको उनले बताए ।

‘आज बिहीबार दाजुसँगै काम गर्ने गाउँकै अर्का दाइलाई फोन गर्दा कल लाग्यो । दाजुसँग पनि कुराकानी भयो,’ गोरखबहादुरले भने– ‘दाजुले आफू सुरक्षित ठाउँमा सकुशल रहेको र चिन्ता नगर्न भन्नुभयो । त्यसपछि हामी निकै खुसी भयौँ । आमासहित सिंगो परिवार नै खुसी छौँ ।’

ल्हसङसहित तीनै जना करिब पाँच महिनादेखि जलविद्युत आयोजनाको सुरुङमा काम गर्दै आएका थिए ।